بشیر امیرخانی - ئەڕا شەنگاڵ

ئەڕا شیوە کردن ئی باسە لازمە توزێک بچمە دویاوە و بزانیم ئەڕا شەنگاڵ”؟. ڕوژێک تروریستەکان داعش هجوم کردن ئەرا شەنگاڵ، وە قسەێ شاێەت حاڵەکان داعشەکان تعدادێان زیاتر لە ٢٠٠ نەفەر نوەیە و وە چەندین ماشین هجوم کردنە سە سەر شەنگاڵ، ئە لا حاڵیکدا کە باز هەم وە قسەێ شاێەت حاڵەکان زیاتر لە ٨٠٠٠ پێشمەرگە لەورە جێگیر بینە. ئەوێکە گویا وەرجە ئی هجومە خەڵک شەنگاڵ لە ڵایەن ئاسایش پارتیوە خلع سڵاح، یان چەکەکانیان لە لێان سەنیاسوە ئیە بمینێ کە باوەڕ دێرم گوزەشت زەمان گشت ئی ڕاس و دروگەلە خەێتە دەیشت.

ئەو وەختە کە لازم بی شەنگاڵ بپارێزیەت و نیرو ئحتیاج داشت، پارت دمکرات نێروەکەێ کیشاە دویاوە و خەڵک شەنگاڵ بی پەناە و بەێ کەس وە شێوەێکی دڕندانە کەفتنەوەر پەلامار داعش و باقی داستانەکە گشت زانن کە چە وە سەر ئەو ملەتە هات. شەنگاڵ قەتل و عام کریا، انفاڵ کریا، بێ سەر و شون کریان خاکەکەێ وێران کردن، کەسێک هەوڵ نەیا نوا ڵی بگرێ و نیرو ئەڕاێ پارێزگاری کڵ بکەێ. ئیستاە وێرانەکەێ شەنگاڵ چە لزمێک وە ٦٠٠٠ پێشمەرگەێ کورد سوریە دێرێ کە بچن دفاع لە ڵێ بکەن. ئەێ ‌ هێز کورد وە ناو ڕوژ کە لە کوردەکان سوریە پێک هاتنە ئەڕا ناچن دەفاع لە خاکەکەێ خوەێان بکەن. ئەێ ئەگەر کورد سوریەن و سەر وە بڕێ لە حزبەکان کورد سوریەن، سەر وە وازارەت پێشمەرگە بیین چر معناێک دێرێ”!؟.

پ ک ک وشێ ئیمە شەنگاڵ لە دەس داعش ڕزگار کردیمە و ئیستایچ هەق خوەمانە خاونداری لە ڵێ بکەیم. من ویشم ئەوێک پ ک ک شەنگاڵ پاراست و دەفاع لە ڵێ کرد جێ ڕیزە و خەڵک شەنگاڵ قەت لە هویرێان ناچوت. دروس کردن دەێان حزب سەر وە پ ک ک لە شەنگاڵ و دروس کردن چەندین ڕێکخریاک لە ڵاێەن پارتیوە لە شەنگاڵ، بی گومان گشت ئیانە بێ ڕێزیە وە خەڵک شەنگاڵ، چویکە خەڵک شەنگاڵ خوەێان خاون ئرادەن و بایەد ئرادەێ ئەو ملەتە لە وەرچەو بگیریەت. ئەێ ئەگەر قەرار بووت، پ ک ک و پارتی لە سەر هەساو خەڵک شەنگاڵ وە خەڵک شەنگاڵ تەسبی هەساو مل ملانیە سیاسیەکان خوەێان بکەن، چە فەرقێ وە داعش دێرێ؟. ئەڕا ئیانە نایلن خەڵک شەنگا خوەێان بڕیار دەر بوون لە سەر ژیان خوەێان؟. وە قەوڵ پێشەنان ئیە شەر دو موسەڵمانە لە سەر ماڵ جویلەکەێک، کە جویلەکەکە بیەسە ئیزەدیەکان.

بشیر امیرخانی

ئەڕا هەناردن هێز ڕوژ ئەڕا ڕوژاوا ڕێگە فرەس و پارتی توانست وە ڕاسی لە ڕێگاێ تورکیەوە ئەو نێروە کڵ بکەێ ئەڕا سوریە، ئەگەر هەدەف ئی نێروە دەفاع لە خاک کوردستان سوریەس. ماوەێ شەش مانگە ئی باسە لە بەین پارتی و پ ک ک هەس و چەندین ڵێدوان جوراوجور لە ڵایەن هەردوک لاوە دریاس، هەم تەهدید و هەم دیاڵوگ، ئەوجورە دیار زوان دیالوگ کارساز نەویە و پارتی بێ توجە وە ئەوێک جویلە کردن وەی هێزە ئەڕا مەنتەقەێ شەنگال کارەسات لە ڵێ کەفێتوە هیزەکە جویلان و نەتیجەکەێچێ دیمن کە کوشتن و زەخمی بیین چەندین کەس باز هەم لە جوانەیل شەنگاڵ بی. پارتی فرە جار ویشێ کە وجود پ ک ک لە شەنگاڵ شەرعیتە نەێرێ و هەر وەی خاترە باێەد چوڵێ کەن من نازانم ئەگەر وجود پ ک ک لەو مەنتقە مشروعیت نەێرێ ئەڕا وجود نیرو ڕوژ، کورد سوریە) مشروعیت دێرێ؟. لە ‌هاڵێکدا پ ک ک لە خانقین و کروک و فرە شونتر وجود دێرێ.

نازانم سەران کورد لەی دو بەشە دەرد و ڕەنج و مەینەت شەنگاڵ ئەڕاێان کافی نەوی کە دوارە وەی شێوە زەخمەکانێان بکوڵننوە؟.

ئەڕا ئەوێک بزانیم چێ بەڵایک توان وە سەر باقیماندەێ ئیزەدیە بارن بزانن چەن گروە لە شەنگاڵ دروس کریاس.

یەکینەکان پاراستن شەنگال

یەکینەکان پاراستن ژن

یەکینەکانی بەرخودانی شەنگاڵ

هە پە گە

دژە ترور

هێزوکانی پاراستنی ئیزیدخان

هێزەکانی بەرخودانی شەنگاڵ

هێزەکانێ ئاسایشی شەنگاڵ

پلیس عراق

پێشمەرگەێ هەریم

ئیە تەنیا لە مەنتەقەیکی بویچک جور شەنگاڵ ئی کومەڵە گروە مسڵح وجود دێرێ کە شایەت فرە لە ئیانە لە ژێر ئرادەێ ئیزەدیەکان نیەن. وە داخوە ئیزەدیەکان دابەش کریانەسە سەر پارتی،یکیتی،پ ک ک و بڕێکیچ دەوڵەت عراق، ئیە باعث بیە کە ئرادەێ خود ئیزەدیەکان لاواز بکریەت و شەنگاڵ بوتە ململانی بەین پارتی و پ ک ک. باوەڕ دێرم ئەگەر حزبەکان دەس لە سەر ئیزەدیەکان هەڵ بگرن و بیلن خوەێان چارەسەر کیشەکان خوەێان بکەن، کاڕێکی سەخت نیە و تەنیا یەک نێرو لە خود ئیزەدیەکان ئەڕا پاراستن و دەفاع لە ملەت و خاک شەنگاڵ کافیە. وەڵێ ئی جورە دیارە ململانی مەنتەقەیی و حزبی تواێ لە شەنگاڵ یەکلای بوتوە و بێ گومان ئیە زەنگێکی خەتەرە ئەرا پاشماوەێ ئیزەدیەکان. چێ دێری میر ئیزەدی بوێرانە و دویر لە وابەستەگی وە هویچ حزبێک و تەنیا لە بەرژەەندی شەنگاڵ و ملەت ئیزەدی هەڵوێست بگرێ و قسەێ ڕاس خوەێ بکەێ. من فرە جار لە میدیاکان شنەفم وە ڕاسی میر ئیزەدی و سەروک جفات ڕوحانی ئیزەدی قسەکانیان هەر ڕوژ وەل ڕوژێکترا فەرق دێرێ، لە میدیای هەرکام لە ئەو حزبگەلوە قسە بکەن وە باب مەیل ئەو حزبە قسە کەن ، کە ئیە خەتەرێکی گەورەس ئەڕا دویا ڕوژ ئی مەنتەقە.

سەران کورد کە ئیستاە هانە دەسەڵات و خاوەن حزبن، هەمویشە ئێراد لە دەسەڵادارەیل داگیرکەر گردن کە زوان دیالوگ نەێرن و ناتوان وە دیالوگ مسئەلەێ کورد هەڵ بکەن!!؟؟. ئەێ ئیستاە نە داگیرکەر وە تەعریف ئەوان ها مەنتەقە و نە نە هویچکام لەو وڵاتگەلە کە نەێار کوردن، بەڵکە گشت کوردن و حزب کوردیە، ئەێ ئیوە ئەڕا زوان دیالوگ نەیرین؟ ئیە نیشان دەێ دەسەڵات هەر دەسەڵاتە بکەفێتە دەس هەر کەس و ڵاێەنێک چ کورد بو چ عرب فرق ناکەێ و ئەڕا حفظ دەسەڵاتەکەێ خوەێ جور داگیر کەر ڕەفتار کەێ. ئەوێک باس لە ئازادی و یەکسانی کریەت تەنیا خوڵ وەچەو مەردوم فقیر کردنە و هویچ جیاوازی لە بەین ئی جور دەسەڵاتێک کە وەی شێوە ڕەفتار کەێ وەڵ دەسەڵات وە ناو داگیرکەر نیە.

من وەختێ تماشاێ وەزیەت شەنگاڵ و حزبەکان باشور کوردسان کەم، دەقیقا ئایندە و مەنتەقەێ یارسان نشین وە هویر خوەم تێرموە کە ئەگەر ڕووژێک کورد بوتە خاوەن دەسەڵات لەی مەنتەقە وەزعیەت ئی کۆمەڵگاە چە وە سەرێ تێ؟. وەڕاسی تاریخ و گوزەشتەێ تەمام حزبەکان ثابت بیە و دیمنە کە هویچکامێان لە خەم وڵات، ملەت و مەردوم نیەن، بەڵک هەرکامێان فرەتێر هەوڵ دەن هژمونی خوەێان لەوێکتر زیاتر نیشان بیەێ. وە گەرنە ئەگەر خەڵاف ئی قسە بووت و ئەگەر ئی حزبگەلە هانە خەم خاک و مەردم شەنگاڵ ئەڕا نایلن خوەێان بونە هەڵێک ئەڕا موشکڵاتەکان خوەێان، دروس کردن دەها حزب وە ناو شەنگاڵ وە خاتر چەس؟ بێ گومان دروس کردن ئی حزبگەلە ڕقابەتێکی ناسالمە کە لە بەین حزبەکان باشور و پ ک ک هاتگەسە ئاراوە. ئی حزبگەلە کارێ کردنە کە ئیزەدیەکان نەتوانن جاوەن ئرادەێ خوەێان بون تا بتوانن وە ئرادەێ خوەێان مشکڵات ئی مەنتەقە هەڵ بکەن.

شەڕ وە تایوەت شەڕ براکوژی نگریسە و ناوەکەێ دیارە کە شەڕ براکوژیە. کەسێک لە براێ خوەێ ڕەخم ناکەێ لە دیگەران چوی ڕەخم کەێ، چوی توانی باوەڕ وە حزب یا دەسەڵاتێک بکەی کە براێ خوەێ کوشێ وە خاتر دەسەڵات؟!.

سەرەڕاێ هورمتم ئەڕا مبارزە و کار و زەحمت ئی حزبگەلە کە هانە هەر چور پارچەێ کوردستان، ئەما حەقیقەت تەڵخێک هەس ئەویچ ئەوەسە کە لە تویل دەێان ساڵە کارێک کە ئی حزبگەلە کردنەسەێ وە کەنەێ تەنیا و تەنیا ئەڕا وە دەس هاوردن دەسەڵاتە و باقی شعارەکان کە دەنەێ ئەڕا گەوجاندن ملەتە. باوەڕ وەی ئی شێوە ئحزابە چ ئیستاە و چ ئایندە کار دشوارێکە چویکە خوەێان کارێ کردنە کە دی باوەڕ وە پێان نەکریەت.

ئیستاە هەرکام لەی حزبگەلە یکی لە وڵاتە هاوساکان خەتابار کەن کە ئەوانن خەریکن دەس خەنە ناو کار کوردسان و حزبەکان!!!، یکیان ویشێ ئێران خەریکە لە ڕێ شەنگاڵوە هێڵاڵ شیعی دروس کەێ تا دەسێ بڕەسێتە دەریاێ (چەرمگ) سفید، ئنگار اێران نە دەریا ها ئختیارێ و نە ئرتبات دریائئ لە ئختیارێ بو، ئەوەکەێتر ویشێ تورکیە خەریکە ئاجانداێ خوەێ لە کوردستان پیادە کەێ، ویشێم ئیەیچە ڕاسە، ئەما جێ وە جێ کار ئاجانداێ ئێران و تورکیە و عراق و سوریە خود ئیوە نیەین؟ ئایا ئیوە نیەین کە دونیا خەتا بار کەین و خوەتان بینەسە فریشتە و بێ خەتا.

لە ئاخر قسەکانم ویشم میر ئیزەدی، دیوان ئیزەدی، ڕوش هویر و چالاکەیل ئیزەدی وەرجە هەرکەسێ کەفنە وەر پرسێار، ئەرا هەرکامتان کەفتینەسە باوەش حزبێک و خەریکین ملەت و خاکەکەتان تاڵان کەین؟ بێ گومان ئەگەر ئیانە هەڵ نەڵسن و وەزیفەێ خوەێان ئەنجام نەێەن، دویر لە ئەوێک لە کام حزب نزیکن شەرمەزار ئایندە و نەسڵ ئایندەێ ئیزەدی و مەنتەقەن.

نفرەت لە شەڕ وە تایوەت شەر خودکوشی

نفرەت لە تەفرەقە و بێ باوەڕی

نفرەت لە دەسەڵاتێک کە وە خوین ملەت باێتە دی

ئومێدوارم تەمام ئی حزبەیلە کە شەنگاڵ کردنەسە مەێدان مبارزەێ خوەێان و توان ئستقلال لە بان شەنگاڵ وە دەس بارن، بانە سەر ئەقڵ و توزێک لە بەرژەوەندی مردم شەنگاڵ فکر بکەن و شەنگاڵ بیەنە دەس شەنگاڵیەکان کە خوەیان بڕیاردەر بون لە چارەنویس خوەێان.

بشیر

فنلاند

٦.٣.٢٠١٧

http://www.yarsanmedia.org/ku/?p=3989